I.1. GUVƐRƐNƐMAN KA BAARAKUNDA, NI JAMA LATANGALI MINISIRISO TƆGƆ RA,

Ɲɔgɔnyekulu sɔnna kolasesɛbɛ saba (03) ra. Kolasesɛbɛ fɔlɔ ɲasinna sariyaba bololanin ma, min bi yɛlɛmali don saan 2019, sumanladonkalo tile 15 ka sariyaba n°2019-1111/PRES/PM/MFPTPS/MINEFID ra, o min tun tara ka ɲasin Guvɛrɛnɛman ka minisirisow ni ɲɔgɔn cɛ ka baara ɲanatɔmɔninw tɔgɔtasɛbɛ (IRIME) ma. Guvɛrɛnɛman ka minisirisow ni ɲɔgɔn cɛ ka baara ɲanatɔmɔninw tɔgɔtasɛbɛ sigisariya bɔra saan 2015, sumanladonkalo tile 24 ka sariya n°081/CNT ra, min ɲasinnin bi Guvɛrɛnɛman ka baarakunda lɔyɔrɔba ma.

IRIME kaan bi baarakulu ma, min bi baarasugu dɔw lajɛn o ni ɲɔgɔn cɛ bari, o ka baarakɛfɛɛrɛ ye kelen ye, o ka baarakɛta fanbaw fana ye kelen ye k’a kɛ, baarakɛse makɔnɔninw bi bɔ ɲɔgɔn ma walima o bi kɛ kelen ye. N’o ye sisan ka gwɛlɛyaw filɛ ka taga dugukolo lasagolikow faan fɛ, saan 2019 ka sariyaba min ɲasinnin bi IRIME ma, o lakurayali ka magwɛnta ye, ka baarakuraw basigi dugukolow lasagolibaarakulu kɔnɔ.

O baarakura nunu ye:

- dugukolo lasagolifɛɛrɛ lɔnbaga ;

- dugukolo lasagolifɛɛrɛ lɔnbagaba ;

- dugukolo lasagolifɛɛrɛ ɛnsipɛkitɛri.

Sariyaba nin tali bina kɛ sababu ye, ka dugukolo lasagolibaarakuluw jati mina Guvɛrɛnɛman ka minisirisow ni ɲɔgɔn cɛ ka baara ɲanatɔmɔninw tɔgɔtasɛbɛ kɔnɔ. Kolasesɛbɛ filanan ye siradisɛbɛ jɔnjɔn ye, min bi sira di jango Guvɛrɛnɛman ka ɲɔgɔndanbaara kɛrɛnkɛrɛnninw labɛn walisa ka dɔgɔtɔrɔŋanaw ta baara ra, minw bina mɔgɔkɔrɔbaw wopere walima, minw bina denmisɛnw wopere, n’o ka baarakalan bina kɛ saan 2024 ni saan 2025 kɔnɔ.