Dioula - Conseil des ministres du 06 mars 2024
I.1. GUVƐRƐNƐMAN KA BAARAKUNDA, NI JAMA LATANGALI MINISIRISO TƆGƆ RA,
Ɲɔgɔnyekulu sɔnna sariyaba naani (04) na.Sariyaba fɔlɔ bi yɛlɛmali don saan 2021, funtenibakalo tile 22 ka sariyaba n°2021-0289/PRES/PM/MINEFID/MFPTPS ra, o min tun tara walisa ka lɔyɔrɔ jɔnjɔn di « lɔli » baaraw ma. O sariya nin lakurayali sababu fɛ, o bina se ka baarakɛla dɔw niin don « lɔli » baaraw ka lɔyɔrɔ jɔnjɔn mabɛnw kɔnɔ, olu minw tara ka tugu baarakɛlaw ka ɲɔgɔndanbaaraw sira kɛrɛnkɛrɛn dɔ kɔ. O baarakɛlaw ye: dugukolow labɛnni lɔnni bi baarakɛla minw fɛ, dugukolo labɛnfɛɛrɛ bi baarakɛla minw fɛ ani dugukolo labɛnfɛɛrɛ lɔnbagaŋanaw.
O sariyaba nin tali bina kɛ sababu ye, « lɔli » baaraw ka lɔyɔrɔ jɔnjɔn b’o baara nunu jati mina o ka mabɛnw kɔnɔ, jango, o kaan bi baarakɛla minw ma, olu bɛɛ ka se ka ɲataga sɔrɔ o ka baara kɛli la. Sariyaba filanan bi yɛlɛmali don saan 2021, funtenibakalo tile 22 ka sariyaba n°2021-0287/PRES/PM/MINEFID/MFPTPS ra, o min tun tara walisa ka lɔyɔrɔ jɔnjɔn di « jii, sɛnɛ ni sigiyɔrɔ n’a lamini » baaraw ma. O sariya nin lakurayali sababu fɛ, o bina sɛnɛ kɔnseyew (ladilikɛlaw) ani sigiyɔrɔ n’a lamini ɛnsipɛkitɛriw (sɛgɛsɛgɛlikɛlaw) niin don « jii, sɛnɛ ni sigiyɔrɔ n’a lamini » baaraw ka lɔyɔrɔ jɔnjɔn mabɛnw kɔnɔ, walisa o ka se k’o ta ni baarakɛlaw ka ɲɔgɔndanbaara kɛli ye, min mako ti lakɔli seereyasɛbɛ ra. O sariyaba nin tali bina kɛ sababu ye, « jii, sɛnɛ ni sigiyɔrɔ n’a lamini » baaraw ka lɔyɔrɔ jɔnjɔn mabɛnw bi waleya ka ɲa.
Le Service d'information du Gouvernement